MANILA, Philippines — Halos nag-ensayo lang ang Secretary nang angkinin ang titulo ng MARHO Breeders’ 3-Year-Old Filly Mile race na inilarga noong Linggo sa Metro Turf, Malvar-Tanauan City, Batangas.
Paglabas ng aparato ay biglang kumaripas ang Secretary papunta sa unahan para hawakan kaagad ang dalawang kabayong agwat sa humabol na Make Or Break, Winner Parade at Sister Moon.
Kinapitan ang Secretary ng Winner Parade sa kalagitnaan ng karera pero pagsapit ng far turn ay nakaungos na ng apat na kabayo ang winning horse.
Kaya naman papasok ng huling kurbada ay halos mag-isa na lang na tumatakbo ang Secretary, umabot pa sa anim na kabayo ang bentahe sa rektahan.
Tinawid ng Secretary ang finish line ng may mahigit 10 kabayo ang lamang sa pumangalawang Winner Parade, habang tersero ang Sister Moon.
Nirendahan ni Mark M. Gonzales, inirehistro ng Secretary ang tiyempong 1:39.6 minuto sa 1,600 meter race sapat upang hamigin ng winning horse owner na si Ronaldo David ang P600,000 premyo.
Nakopo ng second placer na Winner Parade ang P225,000, habang P125,000 ang napunta sa pumangatlong Sister Moon at P50,000 ang inuwi ng Make Or Break na dumating na pang-apat.