Puwede na uli si Durant

MINNEAPOLIS -- Ang pagkilig ng kanyang mga balikat sa free throw line, ang one-legged runners sa lane, ang madulas na mga 3-pointers.

Walong buwan itong hindi nagawa ni Kevin Durant sa isang NBA game.

Sa kanyang pagbabalik matapos mabalian sa kanang paa na dumiskaril sa kampanya ng Oklahoma City Thunder sa nakaraang season, tila hindi nawala si Durant.

Umiskor ang dating MVP ng 15 points mula sa 5-for-8 shooting bukod pa sa 4 assists sa loob ng 22 minuto sa preseason opener ng Oklahoma City laban sa Minnesota Timberwolves nitong Miyerkules ng gabi.

Walang nakitang epekto ng foot injury kay Durant na nangailangan ng tatlong operasyon para ayusin.

Hindi siya pipilay-pilay, hindi namimilit sa sakit at maski ang minsang pagpagpag sa kanyang paa ay walang naramdaman si Durant.

“I felt great,’’ sabi ni Durant. “I think it was a little different. I haven’t been in my routine in a while as far as going to shootaround, taking my nap, getting to the game. So all that stuff was different. But once I got on the court, I felt right at home.’’

Huling naglaro si Durant noong Pebrero 19 laban sa Dallas. Hindi siya nakita sa aksyon sa 55 games at sa huling 28 ng nakaraang season bunga ng naturang foot injury.