Sama sa gipaabot, daghang nagyawyaw nganong si Gomez ang nidaog sanglit sukwahi siya sa naandan nga imahe sa usa ka beauty queen. Una, wala niya itago sukad pa sa pagsalmot niya sa Bb. Cebu nga lesbian siya ug aduna siyay ka relasyon nga babaye sa hataas na nga katuigan. Giangkon sab niya nga aduna siyay mga tattoo sa iyang lawas.
Gumikan niini daghang nisaway sanglit siya ang labing unang beauty queen sa Pilipinas nga niladlad gyud sa iyang pagka siya. Adunay daghang mga beauty queens sa nanglabay nga panahon nga babaye sab ang mga ka relasyon, apan sila puros nagtago sa ilang pagka sila gumikan sa kahadlok nga hukman sila sa publiko.
Navy reservist sab si Bea. Gani, ang sikat nga social media personality nga si Carl Black Ang nipagawas na og mga hulagway kang Bea isip “Wonder Woman.” Kini kay ang Wonder Woman nga si Gal Gadot, nipailawom sab og military training didto sa Israel. Kanhi sab siya pambato sa maong nasud sa Miss Universe 2004.
Ang nakahugyaw kay sa Israel ipahigayon ang 70th edition sa Miss Universe sa December puhon. Buot pasabot, aduna na lay duha ka mga bulan si Bea aron makapangandam siya alang sa nahisgutan nga international pageant.
“Unanimous Decision”
Daan na nga napanlantawan nga dili gyud mabentahaan si Bea sa maong kompetisyon. Kini kay nindot na gyud siya og performance sa preliminaries nga gilangkuban sa Q&A, evening gown ug swimsuit competitions.
Ug nakumpirma ang tanan dihang si Bea gyud ang niharus sa duha ka importante nga minor awards sa coronation night mismo nga mao ang Best in Evening Gown ug Best in Swimsuit. Ang maong mga pasidungog maoy nagsilyo sa korona nga nagpaabot kang Bea sa katapusan nga bahin sa kompetisyon.
Dugang niini, gibutyag sa usa sa mga hurado, Dra. Vicki Belo, sa iyang IG Story, nga managsama gyud og hukom silang lima ka mga hurado: Rayna si Bea. Nagkahiusa sab sila sa ilang desisyon nga si Dimaranan ang koronahan isip Miss Universe Philippines Tourism.