“May childish side si Cristine. May pagkabata siya,” nagkanayon si Diego Loyzaga kabahin sa first impression niya sa iyang leading lady sa Pinoy adaptation sa Korean drama series nga “Encounter” nga isalida na sugod ugma sa gabii sa TV5. Pagbawos sab ni Christine, “The first thing I noticed, ahhmm... very ano siya, very charming.”
Palansaron
Giagni matud pa ni Presidente Rodrigo Duterte si Willie Revillame aron mokandidato og nasudnong posisyon sunod tuig aron mas daghan pa siya og matabangan. Suma pa sa PEP Cabinet Files, nakigpanihapon ang presidente kang Willie kauban si Senator Bong Go didto sa Malacanang niadtong Martes aron personal nga pasalamatan ang TV host sa mga tabang niini ngadto sa mga kabos sanglit dako usab matud pa kini og natabang sa nasudnong pangagamhanan. Mahitungod sa pag-agni sa presidente, nitubag matud pa si Willie nga iyang hunahunaon ug iampo ang maong butang.
Very Loyal
Loyal gyud si Angeline Quinto sa ABS-CBN, ug nungka nga mobiya siya. Karon matud pa siya mas gikinahanglan sa ABS-CBN nga mosuporta human wala na renew ang franchise niini. Gawas pa, sa ABS-CBN siya nakahibalag og mga tawo nga giisip na niyang pamilya. Ug sa kadaghang singing contests nga iyang giapilan kaniadto sukad sa bata pa siya, apan sa ABS-CBN ra gyud siya nakadaog. Labaw sa tanan, wala siya pasagdi sa ABS-CBN. Gani, tulo na ang iyang show: It’s Showtime, ASAP Natin To ug ang primetime series “Huwag Kang Mangamba” nga magsugod na karong Lunes puhon. Bida sab siya sa two-part episode sa MMK nga gisalida na niadtong Sabado ug ugma sab ang second part.