MANILA, Philippines — Kinumpirma ng anak ng "Pamilya Ko" lead star na si Ria Atayde na tuloy-tuloy na ang pag-igi ng lagay ng kanyang mga magulang matapos tamaan ng nakamamatay na coronavirus disease (COVID-19).
Ibinahagi ng nakababatang aktres ang update sa lagay nina Sylvia Sanchez at mister na si Art Ataye sa panayam mensaheng ipinadala sa Starstudio.ph.
"[W]e have been told that our parents’ lungs are finally cleared from pneumonia. Another test has been done to see if they’re negative for COVID-19 before they can finally go home," ayon kay Ria.
"We continue to ask for prayers as they are not out of the woods just yet."
Muli naman siyang humingi ng pasasalamat sa lahat ng nagpakita ng kanilang pagmamahal at suporta sa kanilang pamilya sa gitna ng pinagdadaanang unos.
Unang isiniwalat ni Sylvia ang tunay na kalagayan ng kanyang kalusugan noong ika-31 ng Marso, kung saan sinabi niyang nagpositibo sila sa sakit matapos makaranas ng panlalamig, pag-ubo at mababaw na paghinga.
Bukod kay Ria, anak din nina Sylvia at Art ang aktor na si Arjo Atayde.
Una nang tinamaan ng COVID-19 sina Christopher de Leon at Iza Calzado, na malaon ay gumaling din.
Kailan lang din nang ibahagi ng GMA broadcaster na si Howie Severino kung paano niya nalusutan ang nakamamatay na sakit.