CEBU, Philippines — Ang Kapamilya actress nga si Angel Locsin maoy bag-ong celebrity ambassador sa Optical Media Board (OMB) nga nakigbatok sa piracy.
Nipirma si Angel og Memorandum Of Agreement sa miaging adlaw ug gitambongan gyud kini ni OMB Chairperson Anselmo Adriano.
Matud pa sa aktres nga wala gyud siya nagduha-duha sa pagdawat sa dihang gitanyag kaniya ang maong programa nga motabang sa pagpanalipod sa movie industry sa nasud.
Matud pa ni Angel nga isip usa ka artista, dakong garbo alang kaniya nga malakip sa usa ka butang ka makahatag og kaayohan sa industriya ug usa na niini ang pagpukan sa pirata.
James pasok sa Overpass Music Festival
Gikumpirmar sa Kapamilya star nga si James Reid nga usa siya sa mo-perform sa prestihiyosong Overpass Music Festival sunod tuig.
Ang ubang performers sa maong music festival mao sila si South Korean singer Minho, Thai artist Phum Viphurit,ug Malaysian artist Yuna. Molugwa usab sa maong kalihokan ang American singer-songwriter nga si Jhené Aiko.
Mahitabo kini karong March 7, 2020 sa Oak Canyon Park sa Orange County, California.
Human sa taping, Beauty nalandig sa tambalanan
Dili matud pa basta-basta ang nahiagoman ni Beauty Gonzales sa taping alang sa usa ka bug-at nga eksena sa Kadenang Ginto kun diin ang iyang karakter isip Romina nisulod gyud sa kalasangan human gigukod sa mga konrabida sa maong teleserye.
Sa iyang Instagram story , gibutyag sa aktres nga nalandig gyud siya sa hospital human nakaangkon og grabeng katol sa lawas ingon man usab ang pagbaton og mga garas tungod sa intense niya nga eksena.
Gitataw hinoun ni Beauty nga wala siya nireklamo gumikan kay gihigugma niya ang iyang trabaho.
“Rushed to the hospital this morning due to unbearable itchiness and lots of lacerations and abrasions from work. I’m not complaining, I would give everything I have for my craft because I really love what I’m doing,” suma pa ni Beauty.
Nasayran nga nag-trending gyud og maayo ang maong teleserye sa dihang gigukod siRomina nila ni Eva (Ana Abad Santos), Hector Mangubat (Joko Diaz), ug Alvin Mangubat (Eric Fructuoso).