CEBU, Philippines – Mopahigayon ang GMA Kapuso og audition alang sa The Clash nga unang nadag-an sa Sugbuanon nga si Golden Cañedo. Mao sab kini ang kompetisyon nga naghatag og mga dagkong oportunidad nga makasulod sa showbiz nga gitagamtam karon sa Sugbuanon nga nagikan sa Danao nga si Danielle Ozaraga. Mahitabo ang audition karong Mayo 4 ug 5 sa Gaisano Island Mall Mactan sa Lapu-Lapu City.
Bukas kini sa mga mangantahay nga nagpangidaron og 16 anyos pataas.
Gikinahanglan niini ang pagdala og 4R nga litrato, birth certificate ug ang audition piece.
Gawas sa ipahigayon nga audition, aduna say mahitabo nga meet and greet sila si Danielle ug Golden alang sa ilang mga Sugbuanong fans.
Mokaon og maayo
Karon nga busy na ang schedule ni Pia Wurtzbach, matud pa niya nga dili niya ihikaw ang iyang kaugalingon sa pagkaon og mga lamian nga mga pagkaon. Bisan pa man og nag-maintain siya sa iyang figure, matud pa niya nga daghanon gyud niya og kaon aron daghan siya og energy. Dili sab gyud kalimtan ni Pia ang pag-workout aron dili moburot ang iyang lawas.
Recording artist na!
Bisan kapin pa lang sa usa ka tuig ang pangedaron sa anak nila ni Pokwang ug Lee O’Brian nga si Malia, usa na kini ka recording artist. Gipagawas na sa Star Music ang single niini nga nag-ulohan og “Malia Malia”
Bag-ong putahi
Nawad-an na gyud og identity si Direk Jason Paul Laxamana. Unang naila ang direktor sa pagama og indie films kaniadto. Karon, inanay niya nga gisulod ang pagama og mainstream movies apan gitug-an niya nga na-pressure gyud siya. “As an indie filmmaker who went on to direct mainstream movies, I’ve always felt the pressure of adapting to the ‘nakasanayang’ style that the mainstream usually requires. And there were times I felt NOT myself because of this”, padayag pa sa direktor.
Mobakasyon aron makamugna
Gisaysay ni Bela Padilla nga padayon siya sa pagpangita og inspirasyon aron nga makamugna og maayo nga istorya sa pagahimoon niya nga pelikula puhon. Kahinumdoman nga taod-taod na nga gisudlan sa aktres ang pagka- scriptwriter. Gusto niya nga mobakasyon aron nga makahunahuna og dugang mga ideya.
Gibiyaan sa amahan
Gibutyag sa It’s Showtime dancer nga si Stephen Robles nga wala pa niya mahimamat ang iyang biological father. Matud pa niya nga wala sab siya pasabta sa iyang inahan kun nganong wala siya’y amahan. Dugang pa ni Stephen nga gitabangan siya sa iyang higala aron adunay koneksyon sa iyang amahan ug tuod man, nahitabo kini. Wala niya mapangutana ang iyang amahan sa rason sa pagbiya kanila apan andam siya nga pangutan-on puhon kalabot niini.
Gusto mahimong sexy star
Wala gyud magduhaduha sa pagama og intimate scenes ang bag-ong Kapamilya star nga si Iwana Alawi. Nalakip si Iwana sa bag-ong serye nga “Sino Ang May Sala? Mea Culpa”. Matud pa niya nga hagbay na niya nga gipangandoy nga mahimong usa ka sexy star.
Nagbaha ang projects
Gitug-an ni Edward Barber nga kontento na siya sa dagan sa tandem nila ni Maymay Entrata .Nasayran nga nagbaha ang ilang mga proyekto karong tuiga.
Ipabarang ang mga bastos
Usa ka mambabarang ang karakter ni Maricel Soriano sa pelikula nga “The Heiress”. Matud pa ni Maricel nga kun tinuod man gani ang barang, buot niya nga ipabarang ang mga kriminal sa katilingban sama sa bastos, mangingilad ug mga kawatan.
Todo trabaho
Sunod-sunod gyud ang mga pelikula nga salmutan ni Ai Ai delas Alas. Mapagawas na karong Mayo 8 ang pelikula nga iyang bidahan nga “Sons of Nanay Sabel” ug aduna sab siya’y special participation sa “Kiko En Lala”. Gawas sa mga pelikula, usa na ka brand ambassadress ang comedy Queen sa usa ka sikat nga pagkaon.
Dili pa mag-uyab-uyab
Wala nagdali ang Kapuso star nga si Jo Berry nga makabaton og boyfriend. Sakop siya sa “No Boyfriend Since Birth”. Personal nga desisyon kini ni Jo gumikan sa iyang kondisyon ug gusto sab niya nga mag-enjoy sa iyang showbiz career.