CEBU, Philippines – Giangkon ni Ahron Villena nga nisaka ang gidaghanon sa iyang Instagram followers sukad nga aksidente niya nga na-post ang iyang nude photo sa social media. Giklaro sa aktor nga wala gyud niya natuyo ang pag-post sa maong hulagway. Tungod sa maong hitabo, mabinantayon na gyud siya sa pagamit sa iyang mga social media account.“Nakatulong siya. Lumaki yung fan base ko,” matud pa sa aktor.
Nagtingog na
Gikatahong nag-uli na ang maayong kabubut-on nila ni Sharon Cuneta ug sa iyang anak nga si KC Concepcion. Una na nga nigawas ang taho nga matud pa nahiubos si KC kang Sharon gumikan kay wala kini makalugwa sa pagbukas sa iyang negosyo nga alahas. Matud pa nga nitambong og laing kalihokan si Sharon niadtong higayona.
Mikatawa lang
Gikataw-an lang ni Rhian Ramos ang isyu nga matud pa duna sila’y tinagoang relasyon ni Andre Paras. Matud pa sa aktres nga higala niya si Andre ug wala siya’y ideya nganong gihatagan og malisya ang ilang kasuod.
Pribadong tsika
Malipayong gipahibalo ni Anne Curtis nga duna siya’y nakatsika nga Korean actress nga dili niya panganlan atol sa pagtambong niya sa Bucheon International Fantastic Film Festival didto sa South Korea. Girespeto niya ang privacy sa maong artista.
Lami og love life
Malipayon kaayo si Aiko sa relasyon nila sa mayor sa Subic nga si Jay Khonghun. Dili gyud magpadala si Aiko sa mga negatibong komento batok kaniya.
Tighatod og balita
Nahibalik niadtong Huwebes sa “TV Patrol” ang beauty queen nga si Kylie Verzosa isip Star Patroler. Mga pagdayeg ang nadawat ni Kylie gikan sa viewers gumikan sa kalma niya nga paghatod og mga showbiz balita.
Nilaban kang Kris
Nipadangat si Claudine Barretto sa iyang hugot nga simpatiya ngadto kang Kris Aquino kinsa nagsagubang og daghang isyu. Suma pa ni Claudine nga usa ka maayong higala si Kris.
Giluwas sa mga higala
Giangkon ni Kiana Valenciano nga dili lalim ang naagian niya nga depresyon ug dunay higayon nga gipasakitan niya ang iyang kaugalingon. Mapasalamaton hinuon niya nga naka-survive gyud siya sa maong stage gumikan sa presensiya sa iyang mga higala nga nagpangga kaniya.
Nanglugwa sa London
Nilarga sa London ang mga bituon sa FPJ’s Ang Probinsyano gumikan kay special guests sila sa 34th Barrio Fiesta sa London sa maong dapit. Nagdungan sa paglarga sila si Coco Martin, Yassi Pressman, John Prats, Lito ug Mark Lapid.
Hinay-hinay lang
Gitambagan ni Iya Villania ang mga inahan nga dili angayan nga ma-stress sa pagpadaot og balik inigkahuman og panganak. Suma pa sa aktres nga hunahunaa lang una ang pag-atiman sa anak ug mahimo na mohirit sa pagpagamay sa timbang nga dili magdali.