John suspek sa pagkamatay ni Albert
John
MANILA, Philippines — Panibagong palaisipan ang gugulo sa bawat gabi ng mga manonood ngayong si Anthony (John Estrada) naman ang pagbibintangan sa pagkamatay ni Victor (Albert Martinez) sa Kapamilya primetime serye na The Good Son.
Nakatakdang mabago ang takbo ng imbestigasyon ngayong makikitaan ng motibo si Anthony upang patayin ang sarili niyang kapatid matapos ilahad sa pulis ang naging pagtatalo nila ng kanyang kuya noong araw ng kamatayan nito.
Ngunit may mas malalim pang motibo si Anthony sa pagpatay kay Victor dahil simula pagkabata, minamasama na nito ang paggabay sa kanya ng kapatid at lubos ang naging inggit dito dahil sa matagumpay niyang buhay.
Dahil nga sa pag-igting ng mga ebidensya laban sa kanya, biglang mawawala nang parang bula si Anthony na lalong magdadagdag ng duda sa kanyang kaugnayan sa pagkamatay ng kanyang kuya.
Upang maabswelto naman ang anak mula sa kaso, gagamitin itong pagkakataon ni Olivia (Eula Valdez) upang mapawalang-sala si Calvin (Nash Aguas) at ibaling sa tiyo nito ang imbestigasyon.
Si Anthony nga kaya ang tunay na pumatay kay Victor?
Huwag palampasin ang kakaibang kaso ng pagmamahal para sa pamilya sa The Good Son, gabi-gabi pagkatapos ng La Luna Sangre sa Primetime Bida ng ABS-CBN.
- Latest
