CEBU, Philippines - Nagplano karon ang GMA Films nga mogama og pelikula nga pagaparesan nila ni Richard Gutierrez ug Sarah Lahbati. Si Direk Elaine Lozano maoy direktor sa maong movie project.
Dennis nasagmuyo
Giingong nasakitan pag-ayo si Dennis Padilla sa pagpatangtang sa iyang apilyido sa tinuod nga pangalan sa iyang anak nga si Julia Barretto. Giingong si Julia mismo ang nakahukom niini.
Follow-up project
Human sa kalampusan sa seryeng The Legal Wife, gipangandaman na usab ni Christopher de Leon ang sunod niya nga TV project sa ABS-CBN. Mapasalamaton ang aktor sa maong network gumikan kay wala gyud pasagdi ang iyang career.
Boots mag-artista gihapon
Gipahibalo ni Boots Anson Roa nga wala pa siya'y plano nga mobiya sa showbiz bisan paman nga nagpakasal na sila sa iyang hinigugma nga si Atty. King Rodrigo. Kahinumduman nga nagpakasal ang duha niadtong Sabado sa Archbishop Palace, Mandaluyong City.
Freedom Concert Tour
Nagmalampuson ang Freedom Concert Tour nila ni Marian Rivera, Ogie Alcasid, Alden Richards ug Regine Velasquez sa miaging gabii didto sa Shrine Auditorium, Los Angeles, California.
Marian gibalibaran ni Alma
Gibalibaran ni Alma Moreno ang offer ni Marian Rivera nga himoon siya nga guest sa umaabot nga mga episode sa iyang dance show sa GMA-7. Suma pa ni Marian nga naglain ang lawas ni Alma busa dili kini makatikang sa iyang show.
Ai-Ai dunay ka-date
Milantaw si Ai Ai delas Alas sa pelikulang The Fault in Our Stars sa miaging adlaw ug giingong kauban niya ang usa ka non-showbiz guy. Giklaro hinuon sa komedyanteng aktres nga higala ra niya ang maong lalaki.
Giuswag
Matud pa sa beauty queen nga si Shamcey Supsup-Lee nga wala pa nahuman ang konstruksyon sa balay nga gipatukod nila sa iyang bana nga si Lloyd Lee busa sunod tuig pa sila magplano nga mohulma og bata.
Nag-uban sa sinehan
Nag-uban sila si Kris Aquino ug Derek Ramsay sa sinehan sa miaging adlaw ug kauban usab nila ang mga anak sa TV host nga sila si Josh ug Bimby. Gilantaw nila ang pelikulang The Fault In Our Stars didto sa Greenbelt 3- Cinema 4.
Liza kever sa bashers
Wala panumbalinga ni Liza Soberano ang bashers niya sa mga nagkadaiyang online forum.:"Parang online lang naman nila nagagawa yun," suma pa ni Liza.
Singer nanunggab og higala
Gihan-ay na sa kapolisan ang kaso nga ilang ipasaka ngadto sa 19 anyos nga singer nga si Sherwynn Andrada human kini nidunggab sa iyang higala nga si John Matthew Tamonte. Nahimong finalist si Sherwynn niadto sa Himig Handog sa ABS-CBN.
Hangyo sa fans
Nanawagan napud og balik ngadto sa Viva Films ug Star Cinema ang fans nila ni John Lloyd Cruz ug Sarah Geronimo nga unta magpares napud og balik ang ilang mga idolo sa usa ka pelikula. Kahinumduman nga puros nagmalampuson ang mga pelikula nila ni Lloydie ug Sarah niadto.
Balik-trabaho
Puwerting lipaya ni Joseph Marco gumikan kay ipadayon na ang taping sa Pinoy version sa Korean series nga Pure Love sa ABS-CBN human nakagawas na sa Pinoy Big Brother All-In ang kauban niya sa maong serye nga si Alex Gonzaga. Una kini nga higayon nga mahimong bida si Joseph sa usa ka serye.
Daniel multi-platinum artist na!
Dili na gyud mabangbang ang singing career ni Daniel Padilla gumikan kay padayon nga gipistahan sa katawhan ang album niya nga "I Heart You".
Sa programang ASAP kagahapon, pormal na nga gitunol ngadto kang Daniel ang multi-platinum award gumikan sa kalampusan sa iyang album.
Gipasagdaan lang ni Daniel ang mga tawo nga magsige og saway sa iyang tingog. Ang labing importante alang kang Daniel nga makahatag siya og kalingawan ngadto sa katawhan.
Usa sa mga sikat nga kanta ni Daniel mao ang Nasayo Na Ang Lahat nga nakatungtong niadto sa number one spot sa music chart .