John permi sa condo ni Angelica?

CEBU, Philippines - Duha ka mga tinubdan sa Philippine Entertainment Portal ang gibasehan sa usa ka artikulo nga gimantala sa maong website adtong Biyernes, nga matud pa kanunay nga makit-an si John Lloyd Cruz sa pinuy-anan ni Angelica Panganiban sa Quezon City.

Ang usa miingon nga niining bag-o lang permi makit-an ang award-winning actor sa nahimutangan sa condo sa aktres ug ang ikaduha miingon nga nasigpatan niya si Loydie sa mismong lobby sa condo ni Angelica.

Samtang ang reactions sa forum sa PEP sa maong artikulo managlahi. May mga misaway kang Angelica gumikan kay wala pa gani matud pay tuig ang panagbuwag nila ni Derek Ramsay nakigrelasyon na siya ni Loydie.

May mga miingon nga walay angay masuko kun ugaling tinuod nga uyab na gyud ang duruha sanglit managsama man sila nga single. Samtang may mga miingon nangagpas nga taod-taod na matud pa nga nagkaproblema ang relasyon nila ni Angelica ug Derek human nabutyag nga minyo na diay ang aktor.

May mga nangagpas pud nga hayan dali nga nahug ang pagbati nila ni John Lloyd ug Angelica sa usag-usa sanglit managsama sila nga nakasinati og panagbuwag, busa makasabot sila sa ilang mga pagbati.

May nagtuo nga promo ra ang maong balita sanglit may umaabot man sila nga pelikula, nga maoy gitumbok nga sinugdanan sa ilang relasyon samtang nag-shooting sa Vietnam. Apan may dali nga mitubag nga dili na kinahanglan og promo sanglit box office royalty na matud pa si Loydie, daghang mga sikat nga artista sa Star Magic ang apil niini, ug last quarter pa niining tuiga kini ipasalida.

Sweet pinangga sa Viva

Makigtabo sunod semana sa mga kadagkuan sa Viva Films si John Lapus aron hisgutan ang sunod niya nga pelikula sa maong movie outfit. Tagaan og follow-up movie si Sweet gumikan sa kalampusan sa pelikula niya nga Moron 5 & the Crying Lady.

Sideline ni Jopay

 Samtang wala pa’y regular nga TV show, mi-sideline ang kanhi Sexbomb dancer nga si Jopay Paguia isip dance instructress. Gigamit ni Jopay ang iyang talento aron dili siya mawad-an og trabaho.

Excited makakita sa igsuon

Tsika pa ni Ogie Alcasid nga excited na kaayo nga makita ang mga anak nila ni Michelle Van Eimereen nga sila si Leila ug Sarah sa anak nila ni Regine Velasquez nga si Baby Nate. Gikatakda sila nga mag-abot karong September didto sa Singapore.

Sagpa ang show

Tinud-anay nga sagpa ang gihimo nila ni Lorna Tolentino ug Jaclyn Jose sa ilang komprontasyon sa seryeng Valiente sa TV 5. Giingong mao kini ang sugo ni Direk Joel Lamangan aron hugyaw ang dating niini sa screen.

Bourne Legacy trailer

 Nahugyaw ang mga Pinoy sa trailer sa Hollywood movie nga The Bourne Legacy kung diin tataw kaayo nga gibuhat kini sa Metro Manila. Makita ang mga nagubot nga linya sa kuryente, mga trycle nga nangagi ug uban pa.

Doktor ni Adele

Ang throat specialist ni Cherie Gil nga nakabase didto sa Amerika mao usab ang   doctor sa British singer ug Grammy Award-winner nga si Adele. Nasayran nga nadayon na gyud ang pagpa-check up ni Cherie sa iyang tutonlan sanglit nahuman na ang Legacy.

Tulfo brothers nagpabilin

Ang programang Metro Aksyon maoy temporaryong gihulip sa timeslot sa T3 nga gisuspenso sa MTRCB og tulo ka buwan. Ang mga host sa T3 nga sila si Ben, Raffy ug Erwin Tulfo maoy gipadala sa Metro Aksyon.

Slater dili arte

Gidayeg pag-ayo ang PBB winner nga si Slater Young human kini nasigpatan nga mikaon og batchoy kilid sa dalan sa Salinas Drive kagahapon sa kadlawon. Suma pa sa usa ka hugyawnatic nga dili gyud arte si Slater ug managad gyud kini sa iyang fans.

Bag-ong Regal Baby

Usa na karon   ka talent sa Regal Entertainment ang uyab ni Christian Bautista nga si Carla Dunareanu. Ang signing of contract nahitabo sa miaging adlaw.

Goodbye Tween Hearts

Matapos na karong June 10 ang youth-oriented TV show sa GMA nga Tween Hearts. Nasayran nga eight episodes unta ang unang plano sa maong show apan niabot kini og 87 episodes gumikan kay kanunay kini nga ma-extend tungod sa kakusog sa ratings niini.

Lito makalahutay na sa showbiz

Karon nga nahuman na ang impeachment trial, dili na maapektohan ang schedule ni Sen. Lito Lapid sa gibuhat niya nga proyekto sa ABS-CBN. Suma pa sa senador nga gihuman gyud niya ang impeachment trial sanglit nag-una niya kini nga responsibilidad isip usa sa mga hurado sa nakombikto nga si kanhi Chief Justice Renato Corona.