Fretzie giregalohan og round trip ticket sa iyang fans

CEBU, Philippines - Gisaysay ni Fretzie Bercede dinhi sa Banat News Hugyaw nga adto niya isaulog sa Hongkong ang iyang ika-18 nga adlaw nga natawhan karong Nobiyembre 26.

Suma pa ni Fretzie nga molaag siya sa Disneyland busa naghinam-hinam na siya niini ilabina nga ikauban niya sa paglarga ang iyang Mommy Kim.

Nagkanayon si Fretzie nga ang iyang fans club nga nagbase sa nagkalain-laing dapit sa kalibutan maoy nagtampo-tampo aron palitan siya og round trip ticket ug nagsilbi kini nga birthday gift alang sa ilang idolo.

“Actually mga fans na namong duha ni Bret (Jackson), kay nakauyon daw sila sa among tandem,” matud pa ni Fretzie sa ekslusibong pakighinabi niini sa Banat News Hugyaw.

Nasayran nga linibo karon ka mga Pinoy nga nagpuyo sa nagkalain-laing nasud ang nagpasakop sa Solid Fretziecians.

Suma pa niya nga dili makauban kaniya ang iyang ka-.loveteam nga si Bret Jackson gumikan kay duna kini problema sa Visa.

Ang stage play nga Romeo and Juliet maoy gikabisihan karon nila ni Fretzie ug Bret ug giingong duna pa’y nahibilin nga 30 ka lugar ang ila pang adtoon alang sa maong proyekto.

“Bisan kapoy, pero nalingaw man sad ko og maayo,” hirit pa niya.

Dako usab og pasalamat si Fretzie gumikan sa positibong feedback nga iyang nadawat sa panagpares nila ni Bret sa ikaduhang higayon sa miaging episode sa programang Maynila sa GMA-7.

Matud pa niya nga mahimo ra sila nga makita sa maong programa sanglit independent producer man ang gadumala niini.

Samtang ang amahan ni Fretzie nga si Dr. Dante Bercede misaysay dinhi sa Banat News Hugyaw nga todo ang gihatag niya nga support sa fans club sa iyang anak.

Gani duna na’y mga leaders sa fans club ang nahulma na dinhi sa Sugbo ug nagtigom kini sa miaging semana nga gitambongan mismo ni Fretzie. (Sanden J. Anadia)