"Laki sa Gatas" si Venus Raj

CEBU, Philippines - “Kids must eat healthy [food items] and must study hard to do well in school to attain their dreams in life,” pasabot ni 2010 Miss Universe 4th Runner-up Maria Venus Raj ngadto sa mga tinun-an sa Lahug Elementary School ning bag-ohay lang.

Pinaagi sa “Bear Brand Laki sa Gatas Nutrition Education Advocacy,” nahatagan og dakong kahigayonan si Venus nga agnihon ang kadaghanan sa mga bata sa LES nga maningkamot gyod nga mokaon og mga sustansiyadong pagkaon aron mag-ayo ang ilang disposisyon sa kinabuhi ug nga magkugi pa sila sa ilang pagtoon aron makab-ot ang ilang mga laraw sa kinabuhi. Lakip sab ang mga ginikanan nga dunay nutrition education session kauban si Venus kay dako kaayo ang papel sa ginikanan sa pagpaubos sa malnutrisyon sa nasod. Inay palitan nilag chichirya ang mga bata, o inay ipatad sa lotto o ba kaha masyaw ang kwarta, o ipalit og cell phone load, isiguro kinig palit og gatas. Total mapalit man sa baratong presyo ang Bear Brand ug duna pa gyo’y gidak-on nga sibo sa unsay tukmang gikinahanglan sa pamilya.

Si Venus midako sa kinabuhing banikanhon didto sa Camarines Sur, sa Bicol Region. Gani, wala malilong kanato nga ang mga pilapilan maoy gibuhat niyang rampahanan isip ganghaan sa iyang mga damgo. Buot ipasabot nga anad ang iyang mga tiil nga magkayutik. Tungod lagi kay buot niyang makatabang sa iyang ginikanan, misalmot siyag mga beauty contests ug oratorical competitions. Ang madawat niyang ganti makasapar sab sa uban pang inadlaw’ng panginahanglanon sa iyang banay. Matod pa nga maka-relate gyod ni si Venus sa atong kakabos tungod sa iyang “humble beginnings.”

Gihulagway si Venus nga major, major kugihan! Busa nakahuman siya sa iyang pagtoon. Migradwar siya nga may dungog sa kursong Communication Arts major in Journalism sa Bicol University.

“Hardworking, articulate and determined to succeed, Venus possesses both beauty and brains. This is the optimum combination of physical and mental health that the LSG of Nestlé Philippines is encouraging in all students and pupils,” nagkanayon ang tiggama sa Bear Brand nga maoy nagpasiugda sa maong kalihokan.

Nasayran sab nga ang iyang inahan nga si Esther naningkamot nga ikabahin kang Venus ang kabililhon sa pagkunsumo og mga pagkaong puno sa sustansiya, labi na ang gatas. Matawag nga “complete food” kini. Nasayod si Esther nga ang kahibalo sa iyang anak ug kalantip mas molambo pa’g manglipang kun ang lawas ug hunahuna baskog kanunay. Mao na nga si Venus, bisan og hingkod na, moinom gihapon og usa ka basong gatas kaduha sa usa ka adlaw. Daghan kinig benepisyo ngadto sa immune system. Labing gikinahanglan ni Venus karon ang lig-on nga immune system kay nagsapawsapaw na ra ba iyang mga proyekto. Major, major commitments!

Ning bag-ohay lang namantala man gani nga siya ang gipili sa Department of Social Welfare and Development isip embahador alang sa mga batang kabos.

“I would be more involved in the promotion of the rights of Filipino children, particularly their right to education and health care,” nagkanayon ang 23-anyos nga si Venus kinsa gikuninitan pag-ayo sa mga bata sa Lahug Elem. School. (Eleanor Valeros; Hulagway kuha ni Reynan Villena)