Fretzie mobalik na sa Cebu karong Miyerkules

CEBU, Philippines - Gipahibalo sa Big Brother: Teen Clash of 2010 3rd Big Placer nga si Fretzie Bercede nga anhi gyud siya dinhi sa Cebu motungha apan iyang gitataw nga magbalik-balik ra gihapon siya didto sa kaulohan kung dunay mga opportunidad sa showbiz.

 Gikatakdang moabot si Fretzie dinhi sa Sugbo karong Miyerkules ug naghinam-hinam kaayo siya nga makakita sa tibouk niya nga pamilya, higala ug sa mga Sugboanon nga miidolo kaniya sukad sa pag-apil niya sa PBB.

Malipayon si Fretzie gumikan kay gawas sa iyang pag-guest gahapon sa musical variety show nga ASAP XV, mo-guest usab siya ugma sa Showtime   uban nila ni Bret Jackson ug Ryan Bang.

“Nagpasalamat ko sa taga-Cebu, Banat News ug sa akong family, grabe kaayo ang gihatag ninyo nga suporta nako, dili gyud na nako malimtan, salamat gyud kaayo ninyong tanan.” suma pa ni Fretzie sa exclusive interview sa Banat Hugyaw kagahapon.

Matud pa ni Fretzie nga bisan wala siya nahimong Big Winner, ang importante kaniya nga nasulod siya sa Big 6 ug kontento na siya sa iyang pagbutang sa 3rd place sa maong reality show.

Gidepensahan usab ni Fretzie ang iyang kaugalingon sa intriga nga matud pa nga type niya si Bret hinungdan nga sweet kaayo sila sa PBB house.

“Friend ra gyud akong pagtan-aw niya, dili pako andam anang butanga, “ saysay pa sa 16 anyos nga si Fretzie.

 Aminado si Fretzie nga dili malikayan   nga mag-atubang siya og daghang intriga sa sunod nga mga adlaw busa nangandam na lang siya sa iyang kaugalingon gumikan kay normal lang kini sa showbiz.

Kris: Wala ko malain uy!

Gihimakak ni Kris Bernal ang taho nga matud pa nga nalain siya sa iyang ka-loveteam nga si Aljur Abrenica gumikan sa gipadayag niini nga gusto niya makauban sa usa ka pelikula ang kapamilya star nga si Kim Chiu.

Anne motikang sa GMA-7

Gituohan nga mo-guest puhon sa pipila ka mga programa sa GMA-7 ang Kapamilya star nga si Anne Curtis aron i-promote ang iyang pelikula   uban nila ni Richard Guttierez ug Claudine Barretto nga In Your Eyes.

John naglikay sa intriga

Wala pa’y plano si John Prats nga mosulod og balik sa usa ka seryosong relasyon gumikan kay dili siya gusto nga pistahan og maayo sa publiko ang iyang pangalan.

James nagpatabang kang Mother Lily

Matud pa nga nagpatabang karon si James Yap ngadto kang Mother Lily Monteverde aron masulbad na sa dili madugay ang problema sa relasyon nila ni Kris Aquino.

Regine walay planong magpa-sexy

Giklaro ni Regine Velasquez nga dili gyud siya mo-pose og usa ka sexy magazine sama sa FHM bisan pa man nga nahimutang siya sa ikapitong dapit sa bag-ohay pa lang nga FHM Sexiest Woman in the World for 2010.

DJ Mo adik sa Twitter

Matud pa nga kanunay lang mag-atubang sa iyang laptop ang TV host nga si DJ Mo Twister gumikan kay naadik na kini sa Twitter. 

Cesar gi-obserbahan

Matud pa nga obserbahan og lima ka adlaw sa mga kadagkuan sa Dos ang kasamtangang guest host sa Wowowee nga si Cesar Montano. Mitumaw ang report nga posibleng magdugay ang aktor sa maong show kung makadawat kini og mga positibong feedback gikan sa mga viewers.

Gary saludo kang Jovit

Saludo si Gary Valenciano sa tingog sa Plipinas Got Talent winner nga si Jovit Baldivino busa iyang gipangandoy nga magkauban sila sa usa ka song number sa ASAP XV. “I would love to perform with Jovit. I just need to prepare kasi mas mataas ang range ng boses niya sa akin,” nagkanayon si Gary. - Reyshel Day R. Capablanca

Zaijan kugihan nga estudyante

Matud pa nga adunay higayon nga bation og kakapoy ang lawas sa child star nga si Zaijan Jaranilla gumikan sa ka-busy sa iyang career apan dili gyud kini mo-absent sa iyang klase. Grade 3 student si Zaijan sa usa ka pribadong tunghaan sa Metro Manila.

Melai misaad nga dili   maglinabad

Giangkon ni Melisa “Melai” Cantiveros nga komportable na siya sa set sa comedy show nga Banana Split sa ABS-CBN. Malipayon si Melisa nga nakab-ot na gyud niya ang iyang pangandoy nga mahimong regular nga bituon sa usa ka sitcom busa gisaad niya ngadto sa iyang fans nga dili gyud mausab ang iyang batasan.

Ara wala magdali

Wala gihapo’y bag-ong TV project si Ara Mina ug miulbo usab karon ang report nga matud pa nga wala na’y plano nga mokuha kaniya ang kanhi niya nga programa sa GMA-7 , ang Bubble Gang. Hinuon andam gihapon magpaabot ang aktres og proyekto sanglit wala siya’y angay nga dalian.