MANILA, Philippines - Ang mahusay na Hollywood actor na si Norman Reedus (The Boondock Saints) ay gumaganap bilang si John Rollins, may-ari ng isang nasisirang lupaing pansaka. Nang itayo niya ang isang kakaibang scarecrow sa kanyang lupain, naging masagana muli ito. Ngunit ang ginhawa ay napalitan ng mga kababalaghan na unti-unting gumugulo sa matinong pag-iisip ni John. Nag-iba rin ang pakikitungo niya sa kanyang pamilya na mauuwi sa isang madugo at nakapangingilabot na katapusan.
Tulad ng blockbuster hit na The Messengers na mula kay Sam Raimi (producer ng The Grudge Trilogy, director ng Drag Me To Hell) at pinagbidahan ni Kristen Stewart (Bella ng Twilight), ang pinaka-aabangang pruquel na ito na nagtataglay ng makatotohanang pagganap at nakagugulat na eksena ay tiyak na magbibigay ng matinding kilabot sa mga manonood.
Masasaksihan na ang paghahasik ng lagim sa The Messengers 2: The Scarecrow sa mga sinehan sa ika-3 ng Pebrero. Handog ng Viva International Pictures.