Tres Queridas (40)
MALAMIG ang hangin sa gilid ng lumang gasolinahan. Sa di-kalayuan, nakatayo si Jack sa tapat ng sasakyan habang kausap ang gas attendant, malayo ang tingin at patuloy na nagmamasid sa paligid. Napabuntong-hininga si Celeste, nakakrus ang mga braso habang nakasandal sa pader ng saradong convenience store. Inis at dismayado pa rin ang kaniyang mukha.
“Masyado ka nang paranoid, Diana,” pambungad ni Celeste. “Nahihiya ako kay Jack. Napaka-professional nung tao at narito siya para tulungan tayo…”
“Gaano mo ba kakilala si Jack para ibigay mo ang buong tiwala sa kanya?” tanong ni Diana.
Natigilan si Celeste. Lumingon siya kay Diana, kumunot ang noo sa matinding pagtataka. “Anong klaseng tanong ‘yan?”
“Seryoso ako, Celeste. Gaano mo siya kakilala?” muling tanong ni Diana, mahinahon at pilit na ibinababa ang tono ng boses. “Saan mo siya nahanap? Paano mo siya na-hire?”
“Inirekomenda siya sa akin ng kakilala ni Daddy noong nagsisimula pa lang akong mag-imbestiga kay Carlo,” mabilis na sagot ni Celeste. “Sinuri ng kompanya ang background niya. Malinis ang background niya. Bakit ba—”
“Tingnan mo siya,” mahinang utos ni Diana, itinuturo si Jack.
Napatingin si Celeste sa gawi ng sasakyan.
“Tingnan mo ang hugis ng mukha niya, Celeste,” patuloy ni Diana, nanginginig ang boses. “’Yung tindig niya habang naghihintay... ‘yung paraan ng pag-aalaga niya sa ‘yo kapag nahihirapan ka. Hindi mo ba talaga napapansin?”
Kumunot ang noo ni Celeste, akmang magagalit na naman. “Diana, nag-iisip ka na naman ng kung anu-ano—”
“Si Carlo ang nakikita ko sa kanya, Celeste!” pagsisiwalat ni Diana, halatang nanginginig ang buong katawan.
Natahimik si Celeste. Dahan-dahan siyang muling tumingin kay Jack na kasalukuyang nag-aabot ng bayad sa gasoline boy. Sa unang pagkakataon, hindi lang bilang bodyguard ang pagtingin niya sa lalaki. Tinitigan niya ang hulma ng mukha nito, ang paggalaw ng mga balikat nito, at ang seryoso ngunit malambot na paraan ng pagtingin nito sa kanya kapag nag-aalala ito. At sa isang iglap, para bang may malamig na tubig na ibinuhos kay Celeste. (Itutuloy)
- Latest
