Driver, 2 pa timbog sa Imus buy-bust
CAVITE, Philippines — Arestado ang isang driver at dalawang pahinante na naaktuhang nagsasagawa ng shabu session sa loob ng kanilang delivery truck sa isinagawang buy-bust operation ng pulisya kahapon ng madaling araw sa Brgy.Bucandala 1, Imus City.
Pawang mga sinampahan ng mga kasong paglabag sa Sec 5, Sec 11, Sec 13 at Sec 14 sa ilalim ng Art II ng RA 9165 (Compreshensive Dangerous Drugs Act of 2002) ang target sa buy-bust na si Junilito Genilsa, 34-anyos, driver, ng #141 Brgy. Bayan Luma 9, Imus City, at dalawang pahinante na sina Alberto Baselonia Reyes, 28, ng B9 L4, Alcoba St., Fortune Ville, Brgy. Salinas 1, Bacoor City, at Jibb Badion, 37, ng B1 L28 Phase A, Lateraza Subd., Brgy. Bucandala 3, Imus City; pawang sa Cavite.
Sa ulat sa tanggapan ni Cavite Provincial Police Office director PCol. Christopher Olazo, alas-11:28 ng umaga nang ilatag ng Imus Police ang buy-bust operation laban kay Genilsa.
Sa kahabaan ng Brgy. Bucandala 1, Imus City, naganap umano ang drug deal at pagdating ng suspek sakay ito ng delivery trak ay huminto sa nasabing lugar.
Nang magkaabutan ng droga at bayad mula sa tumayong poseur buyer, dito na dinakma ng grupo ng pulisya ang suspek at nang kanilang siyasatin ang trak, dito naaktuhan sa loob nito ang dalawa pang kasamahan na humihithit umano ng shabu.
Narekober sa mga suspek ang 5-plastic sachet ng shabu na nasa 0.40 gramo at may halagang P2,720, dalawang nakabukas na plastic sachet at may lamang shabu, dalawang foil strips na may marka ng droga, dalawang nakarolyo na foil, isang disposable lighter at ang marked money na ginamit sa operasyon.
- Latest
