MANILA, Philippines — Dahil sa matinding selos, patay ang isang 33-anyos na ginang matapos barilin sa ulo ng kaniyang live-in partner kasunod ng kanilang mainitang pagtatalo sa bayan ng San Jose, Batangas kamakalawa.
Kinilala ang nasawing biktima na si Rona May Corañez, na idineklarang dead-on-arrival sa pagamutan dahil sa tama ng punglo sa ulo.
Nahaharap naman sa kasong kriminal ang live-in partner nito na nakilalang si Bin Nazzer Aguila.
Sa report ng Batangas Police, nangyari ang insidente sa loob ng tahanan ng mag-live-in partner sa Brgy. Lalayat ng bayang ito dakong alas-4:20 ng madaling araw. Nagkaroon ng mainitang pagtatalo ang dalawa matapos naman ang matinding selos ng nasabing mister sa ginang na nauwi sa pamamaril.
Nagagalit umano ang suspek dahil sa laging nakapustura ang ginang kaya pinagdudahan na may pinagpapagandahang ibang lalaki.