OLONGAPO CITY, Philippines — Pinagpapaliwanag ni Olongapo Mayor Rolen “Lenj” Paulino ang power supplier sa kanilang lungsod dahil sa mataas na singil sa kuryente.
Ito ay bunsod sa reklamong tinanggap ni Paulino mula sa mga residente dahil sa biglang pagsirit umano paitaas ng halaga ng electric bill na kanilang binabayaran nitong nagdaang buwan sa Olongapo Electricity Distribution Company (OEDC).
Sa liham ni Mayor Paulino kay Jose Maria Abaya, presidente ng OEDC, ipinunto ng alkalde na batid nila ang naging pagtaas ng generation system charge mula sa kanilang generation partner. Habang nananatili naman sa P0.9838 kada kilowatt hour (kWh) ang kanilang distribution system charge.
Mas mataas din umano ang singil sa presyo ng kuryente sa Olongapo kung ikukumpara sa mga kalapit na bayan.