IBA, Zambales, Philippines — Arestado ang isang lalaki na dadalaw sa kaibigang preso sa provincial jail matapos mabisto na ang dalang tinapay ay may palamang shabu na nakatago sa cup noodles naganap kamakalawa.
Kinilala ang naarestong suspek na si Josef Oliver Valdijon, 37, traysikel drayber at residente sa nabanggit na lugar.
Sa ulat, alas-4:00 ng hapon nang dumalaw ang suspek sa naturang piitan para hatiran ng pagkain ang kaibigang nakakulong.
Protocol sa piitan na inspeksiyunin ang mga dadalaw at ang dala nilang mga pagkain kaya’t nang bulatlatin ng jail guard ang dalang pagkain ay tumambad ang siyam na pakete ng hinihinalang shabu na nakapalaman sa ensaymada at nakatago ang iba sa cup noodles, na tinatayang abot sa labing isang gramo (11 grams) at nagkakahalaga ng P66,000.
Nagawang makatakas ng suspek, pero kalaunan ay nasukol ito ng mga rumespondeng pulis.
Nabatid na ang suspek ay dati nang nakulong sa nasabing piitan sa kaso ng iligal na droga at nakalaya ito matapos ang apat na taon.
Kaya’t muling balik kulungan ang suspek na sinampahan ng kasong paglabag sa Comprehensive Dangerous Drugs Act of 2002.3