CABANATUAN CITY, Nueva Ecija, Philippines — Matapos ang halos 10-taong pagtatago sa batas, bumagsak sa kamay ng pulisya ang isang 51-anyos na lalaki na nakatalang top 3 most wanted person sa Gitnang Luzon, matapos itong madakip ng pulisya sa Barangay Sumacab Norte ng lungsod na ito, kahapon ng umaga.
Kinilala ni P/Lt. Col. Barnard Danie Dasugo, hepe ng pulisya rito, ang naarestong suspek na si Alberto Soriano Jr., may-asawa ng Barangay Sumacab Norte, Cabanatuan City.
Si Soriano ay wanted sa 2-counts of rape at acts of lasciviousness sa menor-de-edad na anak ng kanyang live-in partner noong 2012.
Matapos ang ilang araw umanong surveillance, nadakip ang suspek ng Cabanatuan City Police, bandang alas-9 ng umaga.
Hinuli ang suspek sa bisa ng warrant of arrest na inilabas ni Presiding Judge Johnmuel Romano RD Mendoza ng Regional Trial Court Branch 26 sa Cabanatuan City. — Raymund Catindig