Hitman ng NPA tumba sa Isabela
TUGUEGARAO CITY, Cagayan , Philippines — Isang umano’y hitman ng New People’s Army ang napatay matapos manlaban sa mga pulis sa isinagawang pagsalakay sa kanyang hideout sa Brgy. Palacian San Agustin, Isabela kahapon.
Sinabi ni Isabela Police director Colonel James Cipriano na nagtamo ng mga tama ng bala sa katawan si Renato Busania nang salubungin niya ng putok dakong alas-10:00 ng umaga ang mga pulis na may bitbit na arrest warrant na ipinalabas ni RTC Judge Bonifacio Ong noon pang 2007 sa kasong double murder.
Idineklarang patay sa ospital si Busania na nakuhanan ng isang granada bukod pa sa kanyang kalibre 45 na boga.
Sa rekord, si Busania ang tinukoy na berdugo ni Isabela Bayan Muna Secretary General Elena Mendiola at kinakasama nitong si Ricardo Balauag na chairman ng una sa Echague noong 2006. Nag-ugat umano ang pamamaslang dahil sa alitan sa pera.
- Latest