TIAONG, Quezon, Philippines — Patay na at may dalawang tama ng bala ng baril sa ulo ang isang barangay justice na nagmula pa sa lalawigan ng Batangas nang matagpuan sa isang damuhan sa Sitio Tabing ilog, Brgy. Del Rosario ng bayang Ito, kamakalawa ng umaga.
Kinilala ng pulisya ang biktima na si Robert Tobeo, 57, may asawa at residente ng Sitio Buslot,Barangay San Isidro, Rosario Batangas.
Batay sa imbestigasyon, alas-7:45 ng umaga ay naglalakad ang isang residente nang mapansin nito sa damuhan ang isang nakadapa at duguang lalaki.
Natuklasan ng pulisya na taga-Batangas ang biktima at miyembro ng Barangay Justice batay sa nakuha sa kanyang identification (ID) na pinaniniwalaang pinatay saka itinapon sa nasabing lugar.
Nakuha ng SOCO sa tabi ng bangkay ng biktima ang ilang basyo ng kalibre 45.