BALIWAG, Bulacan, Philippines — Isang high-tech na contact tracing ang itinulak ng pamahalaang bayan ng Baliwag sa pamamagitan ng paggamit ng QR code sa mga establisyemento bilang tugon sa paglaban sa COVID-19.
Ayon kay Mayor Ferdie Estrella, ang IAMSAFE ay isang uri ng contact tracing platform na ginawa ng Municipal Information and Communications Technology Office (MICTO). Aniya, ito ay naglalayon na mas mapabilis ang data gathering at monitoring ng lokal na pamahalaan, sa kalagayang pangkalusugan ng mga Baliwagenyo at mga bisita galing ibang bayan.
Binigyang diin ng alkalde, ang IAMSAFE na ang magsisilbing bagong logbook ng bawat establisimyento sa Baliwag bilang bahagi ng ipinatutupad na safety protocol ng pamahalaan at para na rin sa seguridad at kapakanan ng bawat mamamayan.
Paliwanag naman ni Brainard Ardoña, pinuno ng MICTO, na ang IAMSAFE ay puwedeng gamitin ng lahat. Kailangan lamang pumunta sa website na iamsafe.baliwag.gov.ph upang gumawa ng account at i-screenshot ang bibigay na QR o bar code, na siyang ipapakita sa bawat lugar na pupuntahan sa Baliwag.