Trak salpok sa trike: Mister patay, 3 grabe
LEGAZPI CITY, Albay, Philippines — Nagkalasug-lasog ang isang 20-anyos na mister habang malubhang nasugatan ang kanyang misis, 1-taong gulang na anak at ang driver ng sinasakyang tricycle nang banggain sila ng kasalubong na truck sa Rizal Street, Brgy.18, Cabangan, dito sa lungsod kamakalawa ng gabi.
Dead-on-arrival sa Bicol Regional Training and Teaching Hospital ang biktimang si Niño Conde Mula, ng Brgy. San Roque, Legazpi City habang nilalapatan ng lunas ang 18-anyos na asawang si Princess Nikki Aquino, ang lalaking sanggol at driver ng tricycle na si Louie Sodsod.
Sa ulat, dakong alas-11:15 ng gabi sakay ng tricycle (EC-36195) ang mga biktima mula sa sentro ng Legazpi City patungong Albay District nang pagdating sa nasabing lugar ay sinalpok sila ng kasalubong na Isuzu truck (CAN-5255) na minamaneho ni Samuel Mabini Pingad na nag-overtake sa itim na pickup.
Sa lakas ng pagkakabangga, halos mawasak ang sidecar ng tricycle at tumilapon sa kalsada ang mga sakay nito.
Arestado ang driver ng trak na nakatakda nang sampahan ng kaso.
- Latest