Estudyante nilamon ng ilog!
Sa pagsagip sa naanod na tsinelas
SANTIAGO CITY, Isabela , Philippines — Isang Grade 9 student ang nasawi matapos lamunin ng ilog nang tangkaing sagipin ang naanod na tsinelas ng kaklase habang nagsasagawa sila ng group project sa Peñablanca, Cagayan, ayon sa ulat kahapon.
Kinilala ng Peñablanca Police ang nasawi na si Jade Mark Tumaliuan, 15-anyos at residente ng Zone 7, Brgy. Camasi, Peñablanca, Cagayan.
Sa imbestigasyon, dakong alas-9:30 ng umaga nitong Sabado nang magpaalam ang biktima sa kanyang ama na si Joseph Tumaliuan na tatapusin lang umano nila ang kanilang group project na may senaryong “Anak ng Pasig” kasama ang ibang mga kaklase na kanilang gagawin sa isang quarry site malapit sa Josefa Bridge ng Barangay Camasi, Peñablanca, Cagayan.
Nabatid na nagtungo ang magkakaklase sa quarry site upang pagmasdan at gawan ng reaksiyon ang kalagayan at pagsagip sa Pinacanauan River dahil sa epekto ng quarrying nang tangkain nitong sundan at kunin ang naanod na tsinelas ng kaklase dakong alas-11:30 ng tanghali.
Ayon sa report, nahulog ang biktima sa bahagi ng tubig na pinagsagawaan ng paghuhukay ng buhangin na lumalim dahil sa pag uulan.
Nabatid na walang marunong lumangoy sa mga kasamahan ni Tumaliuan kaya’t lumutang na lamang Ito sa tubig nang makarating ang tulong.
Isinugod ng mga sumaklolo ang biktima sa Cagayan Valley Medical Center subalit idineklara siyang dead-on-arrival.
- Latest
