Ex-tserman itinumba sa fruit stand
NORTH COTABATO, Philippines — Pinabulagta ng ‘di pa kilalang gunman ang isang dating punong barangay na unang nadawit sa illegal na droga, habang namimili ng prutas sa isang fruit stand sa Brgy. Buenaflor, Tacurong City, Sultan Kudarat, Linggo ng hapon.
Kinilala ang biktima na si Edwin Guiamalon, dating punong barangay ng Midpandakan, General Salipada K Pendatun, Maguindanao at kasalukuyang nakatira sa Brgy. New Isabela, Tacurong.
Ayon kay Lt. Col. Joel Siason, hepe ng Tacurong Police, alas-5:15 ng hapon habang bumibili ng prutas ang dating opisyal nang lapitan at pagbabarilin ng suspek. Agad na nasawi ang biktima dahil sa mga tama ng bala ng baril sa katawan.
Sa rekord, matatandaang nahuli sa antiillegal drug operation si Guiamalon ng Tacurong Police at ng Anti-Illegal Drug Special Operation Task Force Group sa New Isabela sa nasabing syudad noong 2016.
- Latest
