Holdaper ng STL collector utas sa shootout
NUEVA ECIJA , Philippines — Bulagta ang isang hinihinalang holdaper habang nakatakas ang isa pa makaraang makaengkuwentro ang mga pulis na rumesponde sa ulat na isang STL bet collector ang kanilang biniktima at tinangayan ng pera sa Brgy. Poblacion Centro, bayan ng Aliaga noong Martes ng gabi.
Sa ulat ng Aliaga Police, inaalam pa nila ang pagkakakilanlan ng napaslang na suspek na responsable umano sa panghoholdap sa STL bet collector na si Rolando Baldonado, 55, isa ring E-load retailer at lending money collector ng Barangay Poblacion East II, sa nasabing bayan.
Ayon sa biktima, pauwi na siya sa kanyang bahay bandang alas-7:30 ng gabi nang harangin at tutukan siya ng baril ng dalawang suspek lulan ng kulay itim na Kawasaki Bajaj CT100 na walang plaka at sapilitang kinuha ang sling bag nito na may P1,950 cash na koleksyon, STL paraphernalia at mga identification cards.
Dahil dito, agad na humingi ng tulong sa pulisya ang biktima dakong alas-7:43 ng gabi hanggang sa isagawa ang dragnet operation sa pamumuno si P/Chief Insp. Domingo Apan katuwang ang mga elemento ng 1st PMFC, sa pamumuno naman ni SPO1 Andy Cando. Nang kanilang matunton ang mga suspek, agad umano silang sinalubong ng putok sanhi ng shootout. Isa sa suspek ang bumulagta at dahil sa madilim ang lugar ay nagawang makapagtago at makatakas ng isa pang suspek.
Narekober sa crime scene ang apat na FCC ng cal 9mm; isang cal .38 revolver na may tatlong bala at dalawang fired cartridge case.
Nabawi rin ang sling bag ng biktima at mga laman nito habang narekober ang motorsiklo ng mga suspek na walang plaka.
- Latest