Ama nakipagsuntukan sa anak nahulog sa hagdan, dedo

MANILA, Philippines — Patay ang isang 63-anyos na ama matapos na aksidenteng mahulog sa hagdan nang makipagsuntukan sa sariling anak sa gitna ng kanilang mainitang pagtatalo sa loob ng kanilang tahanan sa Brgy. Binagbag, Angat, Bulacan nitong Martes ng gabi.

Kinilala ang nasawing matanda na si Imidio Ignacio, 63 anyos, dead on the spot matapos na  pumutok ang ulo nang tumama sa semento sa gitna nang pakikipagsuntukan sa anak nitong si Bryan Ignacio, 30 anyos.

Arestado naman  ng mga nagrespondeng operatiba ng pulisya  ang suspek na si Bryan bunga ng nangyaring  krimen.

Sa report , sinabi ni Sr. Supt. Chito Bersaluna, Provincial Director ng Bulacan Police, bandang alas-9 ng gabi nang mangyari ang insidente sa loob ng tahanan ng pamilya Ignacio sa nasabing lugar.

Ayon sa imbestigasyon, bahagyang nakainom ang matandang lalaki kung saan nagkaroon sila ng mainitang pagtatalo ng kanyang anak na nauwi sa suntukan. Matapos na mawalan ng panimbang, aksidenteng nahulog sa hagdan ang matanda na bagaman nagawa pang maisugod sa Norzagaray Hospital ay idineklarang dead-on-arrival dahil sa malaking sugat na tinamo sa ulo.