3 ‘tulak’ tumba, 6 timbog sa drug ops

BULACAN, Philippines — Tatlong sinasabing notoryus na tulak ng shabu ang nasawi habang anim na iba pa ang naaresto ng pulisya matapos na isagawa ang magkakasunod na drug bust operation sa koordinasyon sa PDEA Region-3 na nagbunsod ng shooout sa magkakahiwalay na lugar dito, Lunes ng gabi at Martes ng madaling-araw.

Kinilala ang mga nasawi na sina alyas “Michael” ng San Jose del Monte City;  Ruel Barcelona, ng Pulilan at Kervin Balagtas, 27, ng Brgy. Matimbo sa Malolos City na nagtamo ng mga tama ng bala sa katawan. Nadakip sa operasyon sina Alnor Bangon, Julius Dela Cruz, Crispin Samson, Reynan Dela Cruz, Gina Bugay at Christopher Galvez.

Sa ulat ni P/Supt. Fitz Macariola, hepe ng San Jose Del Monte Police kay Provincial Director P/Sr. Supt. Chito Bersaluna, isinagawa ang unang drug bust dakong alas-3:20 ng madaling araw sa La Poblacion, Brgy. Muzon laban kay alyas Michael na umano’y nanlaban sanhi upang mapatay sa barilan.

Bulagta rin ang suspek na si Barcelona matapos siyang kumasa sa pulisya sa buy bust operation ng Calumpit Police habang nasawi si Balagtas sa loob ng bahay nito sa Brgy. Matimbo, Malolos City matapos na magtangkang tumakas sa drug bust operation ng pulisya.