2 patay sa pamamaril

LEGAZPI CITY, Albay, Philippines – Dalawa-katao ang napaslang makaraang ratratin ng mga hindi kilalang kalalakihan sa naganap na magkahiwalay na karahasan sa Camarines Sur, ayon sa ulat kahapon. Base sa police report na nakarating sa Camp Simeon Ola, naglalakad ang 54-anyos na magsasakang si Enrique Lorzano nang harangin at pagbabarilin ng mga armadong kalalakihan sa Zone 4, Barangay Sagrada sa bayan ng Bato noong Linggo ng umaga. Samantala, napatay din ang dating rebeldeng NPA na si Virgilio Sunaz matapos itong ratratin ng hindi kilalang lalaki sa Barangay Neighborhood sa bayan ng Bato, Camarines Sur kahapon ng umaga. Sa ulat na nakarating sa Camp Simeon Ola, nakatayo ang biktima malapit sa kanilang bahay nang lapitan at ratratin ng hindi kilalang lalaki. Kahit may ilang residente ang nakasaksi sa pamamaril ay walang nagawa para sumaklolo dahil sa takot na madamay.