CAMP JULIAN OLIVAS, Pampanga, Philippines – Napaaga ang salubong ni kamatayan sa tatlong bata matapos itong malunod sa Gugu River sa Barangay Talba, bayan ng Bacolor, Pampanga noong Martes ng hapon. Sa police report na ipinaabot kay P/Chief Supt. Rudy Lacadin, police regional director, kinilala ang mga biktima na sina Nicole Fuentes, 7; Jomar Canyabano, 5; at si Marjorie Canyabano, 3, mga nakatira sa nasabing barangay. Nabatid na nagkayayaan ang mga biktima na maligo sa nasabing ilog kung saan napadako sa malalim na bahagi kaya magkakasabay na nilamon ng tubig. Bandang alas-3 ng hapon nang matagpuan ng mga opisyal ng barangay ang tatlo na nakalutang na sa ilog. Sa pag-aakalang mabubuhay ay isinugod pa sa pinakamalapit na ospital subalit idineklarang patay. Nangako naman ang mga opisyal ng barangay na bibigyan ng tulong pinansyal ang mga magulang ng mga bata.