MANILA, Philippines - Mistulang sinapian ng masamang espiritu ang negosyanteng Koreano matapos na pagsasaksakin hanggang sa mapatay ang kanyang biyanang mag-asawa at sarili nitong misis bago naglaslas ng pulso sa bigong suicide sa loob ng pag-aaring restaurant sa Barangay Maribago, Lapu Lapu City, Cebu kamakalawa.
Kinilala ni P/Senior Supt. Armando Radok, hepe ng Lapu Lapu City PNP ang mag-asawang Koreano na sina Ho An, Kim Soonok at anak na babae na si Young Mi An.
Samantala, natagpuang duguan sa crime scene ang suspek na si Kim Se Wong, asawa ni Young Mi An na naglaslas sa pulso at nasa impluwensya ng alak.
Naganap ang krimen sa Han Ga Wi Restaurant sa Sitio Bagong Bayan Dos bandang alas-2:23 ng madaÂling araw.
Si Kim Se Wong ay isinailalim na sa kustodya ng pulisya at isinugod sa Vicente Sotto Memorial and Medical Center.
Nabatid lamang ang insidente matapos magtungo sa nasabing lugar ang kaibigang Koreano ng pamilya kamakalawa ng hapon dahil hindi sumasagot sa phone calls ang mga biktima.
Gayon pa man, bumulaga sa security guard na si Sharo Inting ang duguang katawan ng kaniyang among si Wong kaya naisugod sa nasabing ospital.
Narekober sa crime scene ang duguang kutsilyo na ginamit sa krimen.
Sinabi ng opisyal na iniimbestigahan pa nila si Wong kung saan posibleng pinaslang muna nito ang mga biyenan at asawa saka tinangkang mag-suicide.