Kadaghanan sa namatay way bakuna

CEBU, Philippines — Kadaghanan sa mga nangamatay sa Covid-19 karong bulana pulos walay bakuna. Base kini sa datanga nahipos sa DOH-7 gikan sa pribado ug pangpublikong tambalanan kun diin sila gi-admit ug nakabsan sa kinabuhi.

Sumala pa ni Department of Health-VII chief pathologist ug maoy Visayas Vaccination Operations Center spokesperson Dr.Mary Jean Loreche sa inadlaw-adlaw niyang briefer sa 66 nga natalang nangamatay, 56 niini walay bakuna.

Gikan kini sa rekord sa walo ka dagkong tambalanan ubos sa DOH-7 sugod Enero 1 hangtud Enero 22.

“56 out of 66 or 85% is not something that we can joke about na konti lang naman sila..because one death is one life wasted, “ matud Dr.Loreche.

Sa mga pribadong tambalanan, dunay natala nga 39 nga namatay nga pulos nataptan og Covid-19, ang 27 nila wala say bakuna.

Subay sa monitoring gikan Agusto hangtud Disyembre sa miaging tuig, nagkagamnay ang gidaghanon sa mga nangamatay dihang nakabwelo na ang pagpamakuna.

Apan karong tuiga, dihang kalit misaka ang mga kaso nabantayan sab ang pagdaghan sa mga nakalas, apan kasagaran nila way mga bakuna. “In a matter of 22 days, 39 ka agad(deaths in private hospitals here)…27 or 69% unvaccinated, “ ni Dr.Lorehe pa.

Ang Cebu Province dunay mas taas-taas nga CFR (case fatality rate) nga .39% kun itandi sa Cebu City nga.31% , samtang sa Lapu-Lapu 0.07% ug Mandaue .24%. kini gikan lang tanan sa mga publikong tambalanan.

Gipasabot sab ni Loreche nga kaning nangamatay dili pa gyud ang kinatibuk-an sa tanang namatay karong buwana kay kadto lang ning mga na-report gikan sa mga tambalanan.

Si Loreche miingon nga dili maayong balewalaon lang ang Omicron variant kay duna lang gihapoy daghang nalandig sa tambalanan, may bakuna man o wala.

Base sa datos,  duna karoy 104 ka residente sa Cebu City; 334 sa Cebu Province; 43 sa Mandaue ug 13 sa Lapu-Lapu ang na-admit sa nagkalain-laing tambalanan.

Malaumon si Loreche kadtong wala pa gihapon nagpabakuna mausab na ang hunahuna ug magpabakuna na gyud.

Sa pagkakaron, 66.18% sa mga pwedeng bakunahan sa Metro Cebu ang fully-vaccinated na.  Sa Cebu City 59.83% na sa populasyon niini ang fully vaccinated, Mandaue 78.53%, Lapu-Lapu 72.47%, Consolacion 72.25%, Talisay 73.21%, Minglanilla 70.43%, Naga 65.94%, Liloan 49.02% ug Cordova 54.25%.

Tungod sa tinguhang maproteksyonan ang kinabag-ang Sugboanon sa isla sa Sugbu, gidasig ang mga LGUs sa Metro Cebu nga modawat og mga dili residente sa ilang lugar nga gustong magpabakuna. —IBM (BANATNEWS)