Diaz, iba pang weightlifters may tsansa sa Paris at L.A. Olympics—Puentevella

MANILA, Philippines — Hindi lamang sa 2024 Olympics Games puwedeng manalo ulit ng medalya ang Pilipinas kundi pati sa 2028 edition.

Ito, ayon kay Samahang Weightlifting sa Pilipinas (SWP) president Monico Puentevella, ay kung magkakaroon ng sapat na international training at exposure ang mga national weightlifters.

Iniluklok kamakalawa si Puentevella sa International Weightlifting Federation Hall of Fame sa Tirana, Albania.

Binuhat ni Hidilyn Diaz ang kauna-unahang Olympic gold medal ng bansa nang magreyna sa women’s 55-kilogram division noong nakaraang taon sa Tokyo, Japan.

Target ni Diaz ang kanyang ikalawang Olympic gold sa 2024 Olympics sa Paris, France at posible sa 2028 edition sa Los Angeles, USA.

Bukod kay Diaz, malaki rin ang tsansang bumuhat ng Olympic medals sina Asian champion at Southeast Asian Games gold medalist Vanessa Sarno, Elreen Ando at Kristel Macrohon sa Paris Games.

Si world junior champion Rose Jean Ramos at kapatid nitong si Rosegie ang maaaring mag-qualify para sa 2028 Los Angeles Olympics.