Alapag handang bumalik ng Pilipinas
Kung may offer na mag-coach sa PBA o Gilas
MANILA, Philippines — Handa si dating Talk ’N Text star player Jimmy Alapag na maging coach ng isang PBA team o ng Gilas Pilipinas sakaling kailanganin ang serbisyo nito sa mga susunod na panahon.
Kasalukuyang nasa Amerika si Alapag kung saan bahagi ito ng coaching staff ng Sacramento Kings na nagkampeon sa NBA Summer League.
Magiging abala rin si Alapag dahil kasama ito sa coaching staff ng Stockton Kings sa NBA G League.
Ngunit kung mabibigyan ng pagkakataon, handa si Alapag na bumalik sa Pilipinas para hawakan ang isang PBA team maging ang national team.
“Absolutely. I’m open to coming back. Manila is still home and so if ever there’s an opportunity to coach a PBA team or even Gilas, it’s something that I would definitely consider,” ani Alapag sa programang No Holds Barred.
Matatandaang lumipad pa-Amerika si Alapag noong nakaraang taon kasama ang kanyang pamilya.
At alam nito na tama ang kanyang naging desisyon dahil nagbukas ang bagong oportunidad sa kanya partikular na ang pagkakataong maging bahagi ng coaching staff ng Sacramento Kings.
Sa kasalukuyan, kasama si Alapag sa paghahanda ng Kings para sa nalalapit na pagbubukas ng NBA season.
- Latest