Vargas handa sa ABAP elections sa Nobyembre

MANILA, Philippines — Nakahanda si Ricky Vargas sakaling may magha­mon sa kanya para sa presidential seat ng Association of Boxing Alliances in the Philippines (ABAP).

Magkakaroon ng eleksyon ang ABAP sa Nobyembre kung saan inaasahang muling maghahangad ng panibagong termino bilang pangulo ang 69-anyos na si Vargas.

“We’re going to hold elections possibly in November at pinaghahandan namin iyon,” wika ni ABAP secretary general Ed Picson. “Hindi natin alam kung ano ang mangyayari sa eleksyon, hindi natin alam kung mayroong mga interesadong tumakbo o magpalakad ng ABAP.”

Unang nailuklok si Vargas bilang ABAP president noong 2009 matapos talunin sa eleksyon si Manny Lopez kasunod ang kanyang mga panalo sa botohan.

Matapos mabigo sina boxers Rogen Ladon at Charly Suarez na makasuntok ng medalya noong 2016 Olympic Games sa Rio de Janeiro, Brazil ay binalak ni Vargas na iwanan ang ABAP.

Ngunit nakumbinsi siyang manatili sa ABAP kasunod ang kanyang tagumpay sa Philippine Olympic Committee (POC) presidential election laban kay Jose ‘Peping’ Cojuangco Jr. noong 2018.

Matapos ang isang taon ay nagbitiw si Vargas bilang pangulo ng POC.

Sa ilalim ng liderato ni Vargas sa ABAP ay dalawang silver medal ang kinuha nina featherweight Nesthy Petecio at flyweight Carlo Paalam sa nakaraang Tokyo Olympcs at may bronze si middlewight Eumir Felix Marcial.