Hinirang ni BBM: Remulla sa DOJ, Balisacan sa NEDA

MANILA, Philippines — Hinirang ni inco­ming President Ferdinand “Bongbong” Marcos Jr., si re-elected 7thDistrict Cavite Rep. Crispin “Boying” Remulla bilang susunod na Secretary ng Department of Justice (DOJ) sa ilalim ng bagong administrasyon.

Sa isang zoom interview sa mga reporters sa Kamara, kinumpirma ni Remulla nitong Lunes ng umaga na tinanggap na niya ang alok ni BBM. Papalitan ni Remulla si DOJ Secretary Menardo Guevarra.

“I accepted it. It’s an honor to serve the country in that capacity,” pahayag ni Remulla na sinabing isang malaking oportunidad para sa tulad niyang abogado na magserbisyo sa bansa sa mas mataas na kapasidad.

Sinabi ni Remulla na hindi siya nag-apply kay BBM sa nasabing puwesto pero ipinahiwatig na sa kaniya ni Marcos noong una pa man na nais nitong siya ang maging susunod na DOJ Chief.

Bilang susunod na Kalihim ng DOJ, si Remulla ang isa sa mga mangunguna sa Anti-Terrorism Council na may kapangyarihang tumukoy sa mga indibidwal at grupo na mga terorista.

Samantala, napisil ni Marcos si Philippine Competition Commission Chairperson Arsenio Balisacan na pamunuan  ang National Economic and Development Authority (NEDA).

Sinabi ni Marcos na nakatrabaho niya si Balisacan noong siya ay gobernador pa ng Ilocos Norte.

Si Balisacan ang hahalili kay outgoing NEDA Director-General and Socioeconomic Planning Secretary Karl Kendrick Chua.

“We have very similar thinking in that regard, kaya malakas ang loob ko. I know he’s very competent, I know his policies are policies that will be to the betterment of our country,” ayon kay Marcos na sinabing kaibigan niya si Balisacan.

Tinanggap na ni Balisacan ang nasabing nominasyon para mapabilang sa gabinete ni Marcos.

Si Balisacan ay dating NEDA Director-General and Socioeconomic Planning Secretary noong 2012-2016.