Magpopositibo sa antigen test isasama sa bilang ng COVID-19 cases

MANILA, Philippines — Balak ng Inter-Agency Task Force (IATF) for the Management of Emerging Infectious Diseases na isama na sa bilang ng mga kaso ng COViD-19 ang mga magpopositibo gamit ang rapid antigen test.

Pero agad ding nilinaw ni Presidential spokesman Harry Roque na dadaan pa rin sa confirmatory test ang mga lalabas na positibo sa rapid antigen test.

Nauna rito, ipinag-utos ng IATF na i-monitor ang alokasyon at paggamit ng mga antigen kits upang matiyak na tama ang reporting ng kaso ng COVID-19.

Ayon kay Roque, ibinaba ang kautusan sa mga regional IATF at mga task forces.

Inatasan din ang Department of Health-National Capital Region for Health Development na pangunahan ang registration ng mga gumagamit ng mga rapid antigen kits.

Dapat aniyang tiyakin na ang mga antigen line test ay makakasama sa monitoring ng mga local government units.

“Kailangan tiyakin ng DOH-NCR CHD na ang antigen line test ay maka-consolidate ng health facilities, temporary treatment and monitoring facilities at sariling LGUs,”ani Roque.