Dear Vanezza,
Ako’y may asawa na at tatlong anak. Sa kabila nito ay isang babae ang muling nagpatibok ng Âaking puso na nauwi sa bawal na relasyon. Napakahirap umiwas sa tukso lalo na at lagi mong kasama at araw-araw nakikita. Lalo pa’t nagpapakita ng interes sa’yo. Kahit anong pigil mo sasablay at sasablay ka. Mahal ko naman ang aking asawa at mga anak. Kaya nga nagpapakasipag ako sa trabaho para mabigyan sila ng magandang buhay. Ngunit iba pala kapag napalapit ka sa tukso. Anong gagawin ko?
Leon
Dear Leon,
Ang pambababae ay tawag lamang ng laman. Kung ang tao ay puwedeng magsakripisyo sa maraÂming bagay alang-alang sa minamahal na pamilya, bakit hindi mo iwaksi sa isip ang tawag ng makamundong pagnanasa? Isipin mo ang posibilidad na mawasak ang iyong pamilya kung hahayaan mong magapi ka ng tukso. Kahit “palay†na ang lumalapit sa’yo kung ayaw mo namang tukain, hindi magtatagumpay ang tukso. Isipin mo rin na ang pangangalunya ay isang malaking kasalanan sa Diyos.
Sumasaiyo,
Vanezza