Sotto kailangan na mag-training
MANILA, Philippines — Kailangan na ni Kai Sotto na sumalang sa training kasama ang Gilas Pilipinas na naghahanda para sa FIBA World Cup na aarangkada sa Agosto 25.
Ito ang inihayag ni Gilas Pilipinas head coach Chot Reyes matapos masilayan ng dalawang beses si Sotto sa training venue ngunit hindi ito nagsanay.
Idinahilan ng kampo ni Sotto ang pangangailangan nitong magpahinga dahil sa lower back injury na tinamo nito sa kanyang stint sa NBA Summer League.
Kaya naman wala rin magawa ang Gilas coaching staff kundi ang maghintay.
Iginiit ni Reyes na kailangan na ni Sotto na makasama sa training camp upang makundisyon na ito para sa matinding laban na kanilang haharapin.
Nais sana ni Reyes na magamit ng husto si Sotto sa pocket tournament ng Gilas sa Guangdong, China para mahasa pa ito ng husto.
Subalit kung hindi ito mag-eensayo, posibleng hindi ito mabigyan ng playing time ni Reyes.
Ikinumpara pa ni Reyes si Sotto kay NBA star Jordan Clarkson.
Malalim na ang karanasan ni Clarkson na sanay na sa matitinding laban sa NBA kumpara kay Sotto na hindi naman NBA player gaya ng Utah Jazz star.
“Kailangan na niya mag-training. Kung gusto niya na maging big part ng team, kailangan na niya mag-training as soon as possible,” ani Reyes.
Target ni Reyes na maayos muna ang team nito bago tutukan ang mga teams na kanilang makakalaban.
May ibang tumututok sa scouting ng bawat teams na makakalaban ng Gilas Pilipinas partikular na sa unang asignatura nito laban sa Dominican Republic sa opening day.
Nakatakdang dumating sa Pilipinas si Clarkson sa Agosto 6 para makasama ang Gilas Pilipinas sa training camp nito.
- Latest
