Phoenix pinutol ang kamalasan
MANILA, Philippines — Winakasan ng Phoenix ang kanilang tatlong sunod na kamalasan mula sa 108-97 demolisyon sa NorthPort sa 2023 PBA Governors’ Cup kahapon sa Philsports Arena sa Pasig City.
Humakot si import Du’vaughnn Maxwell ng 26 points, 11 rebounds, 6 assists, 2 steals at 2 blocks at umiskor din si Jason Perkins ng 28 markers para sa 1-3 record ng Fuel Masters.
Lalo pang nabaon ang Batang Pier sa 0-4.
“We give credit to all the players. Kasi iyong first two games namin we had a chance to win that, so I take the blame for that,” wika ni coach Jamike Jarin. “So we got a win and hopefully, this should be a good winning streak coming into our next game.”
Nagdagdag si RJ Jazul ng 16 points tampok ang limang triples habang may 13 markers si Sean Manganti kasama ang limang tres.
Kinailangan ng Phoenix na malampasan ang pagbangon ng NorthPort mula sa 27-point deficit, 57-84, sa 3:26 minuto ng third period mula sa 55-46 halftime lead.
Nagtuwang sina import Marcus Weathers, Ken Salado at Jeff Chan para ilapit ang Batang Pier sa 87-92 sa 7:12 minuto ng fourth quarter.
Sumandal naman ang Fuel Masters kina Perkins, Jazul at Manganti para muling makalayo sa 107-92 sa 1:08 minuto ng labanan.
Pinamunuan ni Weathers ang NorthPort sa kanyang 29 points at 9 rebounds at may 15 at 10 markers sina Salado at Arthur Dela Cruz, ayon sa pagkakasunod.
- Latest