MANILA, Philippines — Gagamitin ng Converge ICT ang kanilang mga hawak na draft picks para mapalakas ang koponan sa darating na PBA season.
Ito ang sinabi kahapon ni team owner Dennis Anthony Uy sa opisyal na pagpapakilala sa FiberXers bilang miyembro ng PBA.
“Ibubuhos namin ang aming puso sa aming laro,” pagtitiyak ni Uy sa kanilang kampanya sa susunod na PBA season.
May bitbit na No. 3, No. 4 at No. 15 picks ang Converge sa darating na PBA Rookie Draft sa Mayo.
Papasok din ang FiberXers sa mga trades para makahugot ng ilang beteranong isasalang sa PBA Season sa Hunyo.
“We want to be competitive. We will compete to win,” wika ni Uy na inaasahang pananatilihin si head coach Jeff Cariaso kasama sina dating Alaska players Jeron Teng, Ben Adamos, Rey Publico, Jaycee Marcelino, Allyn Bulanadi at Bryan Faundo.
Binili ng Converge ang prangkisa ng Alaska na nagpaalam sa liga noong Pebrero matapos ang 35 seasons bitbit ang Grand Slam championship noong 1996 sa likod ng paggiya ni head coach Tim Cone.