Pinoy surfers kakasa sa El Salvador

Para sa asam na olympic ticket

MANILA, Philippines — Sasabak ang isang six-man Philippine sur­fing team sa World Sur­fing Games sa hanga­ring makahugot ng tiket sa Olympic  Games sa Tokyo, Japan sa Hulyo.

Bibiyahe bukas sina 2019 Southeast Asian Games gold medalist Nilbie Blancada, SEA Games silver medalist Jay-R Esquivel, SEA Games bronze meda­list Daisy Valdez, SEA Games bronze medalist John Mark ‘Marama’ Tokong, Edito ‘Piso’ Alcala Jr. at Vea Estrellado patungo sa El Sunzal, El Salvador para lumahok sa Olympic qualifying meet.

Nakatakda ang World Surfing Games sa Mayo 29 hanggang Hunyo 6 kung saan sasalang ang anim na national surfers sa shortboard category.

“The top Asian who finishes will qualify for the Olympics,” sabi ni United Philippine Surfing Association (UPSA) president Dr. Raul Canlas.

Hindi na gagamitin ng International Surfing Association (ISA) sa World Surfing Games ang qualifying format at sa halip ay magsisilbi itong automatic qualifier para sa 2021 T­okyo Olympics.

Ito ay dahil sa coronavirus disease (COVID-19) pandemic na nagpakansela sa mga surfing tournaments noong nakaraang taon.

“I’m very confident about it, our surfers will climb the top. The qualifiers will be a do-or-die competition so I like our chances,” sabi ni Canlas sa tsansa ng mga national surfers.

Idaraos ang quadrennial event sa Hulyo 23 hanggang Agosto 8.