MANILA, Philippines — Binalaan ng Games and Amusements Board (GAB) si Calvin “The Beast” Abueva na nasa ilalim pa rin ito ng probation.
Ayon kay GAB chairman Baham Mitra, kailangan pa ring tuparin ni Abueva ang lahat ng mga requirements upang tuluyan nang maibalik ang kanyang professional license.
Anim na buwan ang probation period ni Abueva.
Kahit lumipat pa ito mula sa Phoenix patungong Magnolia, mananatili ang estado nito bilang probationary.
“Calvin is still under the six-month probation period. Even if he has transferred to a different team, as a professional athlete licensed by GAB, he still needs to honor what has been agreed upon and his commitment to the Board which was the basis of the reinstatement,” ani Mitra.
Noong Oktubre, binigyan ng pagkakataon si Abueva na muling makapaglaro sa PBA Season 45.
Matatapos ang kanyang probation sa Abril — sakto sa target na pagbabalik-aksyon ng PBA para sa Season 46 ng liga.