Pacquiao fight maapektuhan kaya?
MANILA, Philippines — Bigo si Ultimate Fighting Championship Conor McGregor na magpasiklab sa buong mundo para sana sa kanyang inaabangang salpukan kay eight-division world champion Manny Pacquiao.
Ito ay matapos lumasap si McGregor ng second-round knockout loss kay Dustin Poirier kahapon sa kanilang UFC 257 fight sa Etihad Arena on Yas Island sa Abu Dhabi, United Arab Emirates.
Mainit ang simula ni McGregor nang magpakawala ito ng matitinding atake sa first round.
Subalit hindi nito nasustenihan ang momento matapos umarangkada ng husto si Poirier gamit ang solidong shots na tumama sa ulo ni McGregor.
Nagawa nitong makorner si McGregor na bumagsak sa canvas at tuluyang paulanan ng suntok para masikwat ang knockout win.
Ito ang nagsilbing matamis na resbak ni Poirier matapos lumasap ng knockout loss kay McGregor sa kanilang unang pagtatagpo noong 2014.
Bagsak sa 22-5 ang rekord ni McGregor habang gumanda naman sa 26-7 ang marka ni Poirier.
Dahil sa masaklap na nangyari, malaking katanungan sa ngayon kung matutuloy ang bakbakan nina Pacquiao at McGregor.
Agad na nag-tweet si Pacquiao ng congratulatory message matapos ang laban.
“Beautiful thing about the fight game, anything can happen. Congrats to Dustin Poirier. Huge win!,” ani Pacquiao sa kanyang Twitter account.
Bago pa man magsimula ang bakbakan, nag-post na si Pacquiao ng good luck message kay McGregor.
“Good luck tonight Conor! Let’s make 2021 the best year ever for fight fans,” ani Pacquiao.