Para sa health at safety protocols ng mga Olympic qualifiers at hopefuls
MANILA, Philippines — Naniniwala ang Philippine Sports Commission (PSC) na matapos ang Modified Enhanced Community Quarantine (MECQ) ay mabibigyan ng ‘go signal’ ang mga 2021 Olympic Games qualifiers at hopefuls para magbalik-ensayo.
Ayon kay PSC Commissioner Charles Raymond Maxey, kasalukuyan na silang nakikipag-usap sa Philippine Olympic Committee (POC) at kay 2021 Olympic Games Chef De Mission Mariano ‘Nonong’ Araneta.
Ito ay para sa paglalatag ng health at safety protocols ng mga National Sports Associations (NSA)s na may Olympic qualifiers at hopefuls.
“The PSC and POC together with CDM Nonong Araneta are working closely to prepare the needed health protocols for the resumption of training, especially those who have already qualified for Tokyo (Olympics) and those who are bound for qualifying events,” sabi ni Maxey.
Noong Hulyo 27 ay inilabas ng PSC, Games and Amusements Board (GAB) at Department of Health (DOH) ang Joint Administrative Order (JAO) para sa pagbabalik sa training at conditioning ng Philippine Basketball Association (PBA), Philippine Football League (PFL) at Chooks-to-Go 3x3 national team.
Ngunit bunga ng pagtaas ng kaso ng COVID-19 ay inilagay ng Malacañang sa MECQ ang Metro Manila, Bulacan, Rizal, Cavite at Laguna noong Agosto 4 hanggang 18.
Nakasikwat na ng Olympic berth sina boxers Eumir Felix Marcial at Irish Magno, pole vaulter Ernest John Obiena at gymnast Carlos Edriel Yulo.
Nagsumite na kay Araneta ang mga NSAs na may Olympic qualifiers at hopefuls ng kani-kanilang safety guidelines para makabalik sa training at conditioning.