KO punch laban sa Japanese pug inihahanda na ni Heredia
MANILA, Philippines — Desidido si World Boxing Organization (WBO) bantamweight champion Johnriel Casimero na maagaw ang dalawang koronang hawak ni World Boxing Association (WBA) at International Boxing Federation (IBF) titlist Naoya Inoue.
Kaya naman asahan ang mas mabagsik at mas mabangis na Casimero sa oras na magkrus ang kanilang landas sa Hulyo.
Malakas na ang kamao ni Casimero dahil hindi ito huminto sa pagsasanay sa kabila ng pagkakaantala ng kanilang laban noong Abril 25 sa Mandalay Bay Resort and Casino sa Las Vegas dahil sa coronavirus disease (COVID-19) pandemic.
Ngunit hindi pa kuntento ang Pinoy champion.
Sa katunayan, nagbalik na sa training camp si Memo Heredia upang mas lalo pang hasain ang pamatay na suntok ni Casimero.
Si Heredia ang nagsanay kay Mexican champion Juan Manuel Marquez nang pabagsakin nito si eight-division world champion Manny Pacquiao noong 2012.
Dala ni Heredia ang malalim nitong karanasan na gagamitin nito upang hubugin para mas maging malakas si Casimero.
“He’s (Casimero) a powerful puncher. He’s getting better and better,” ani Heredia.
Inihahanda ni Heredia ang katawan ni Casimero.
Kailangan aniya na maging matatag at malakas ang Pinoy champion sa buong panahon ng 12 rounds.
“I want him to be explosive not only in the first few rounds but in the entire 12 rounds. Hopefully, he’ll be in perfect shape before the fight night,” dagdag ni Heredia.
Bilib si Heredia sa lakas ng kamao ni Casimero.
Ngunit hindi pa panahon para mag-peak.
Kailangang nasa tamang oras ito para masiguro na armado ito ng mga umaapoy na suntok.
“We don’t want to push it. We still have plenty of time to train. I don’t want him to over train. He could be 100 percent now but we don’t want to rush everything,” ani pa ni Heredia.
Tuluy-tuloy ang ensayo ni Casimero para sa laban.
Hinihintay na lamang nito si Inoue na makarating sa Amerika upang magkaroon na ng petsa ang kanilang pagtutuos.
Nauna nang napaulat na Hulyo 25 ang target date para sa Casimero-Inoue unification bout.