Morales uli sa stage 7
Navy riders ‘di matibag sa overall
PALAYAN City, Philippines — Mahirap na ruta ang papuntang Baguio pero para kay Standard Insurance-Navy rider George Oconer ay kailangan kayanin upang manatili sa kanila ang overall individual at team classification sa LBC Ronda Pilipinas 10th anniversary.
Hindi nagalaw ang puwesto sa individual at team matapos manalo ni two-time champion Jan Paul Morales ng Navy sa Stage 7 na nagsimula sa Tarlac City kahapon.
Pangalawa na ito ng 34-anyos na si Morales, nagwagi siya sa Stage 6 noong Sabado.
Nanatiling nasa tuktok ng overall IC si Oconer, 28, may aggregate clocking itong 23 oras, apat na minuto at 13 segundo matapos ang pitong stages.
Tatlong stages na lang pero ayaw pang maniguro ni Oconer na anak ni two-time Olympian, Norberto, gagawin na lang nila ang lahat upang malampasan ang nasabing mahirap na biyahe dahil aakyatin nila ang matatarik na daan papuntang Baguio sa paglarga ng 170km Stage Eight ngayong araw.
“Mahaba ‘yung ahon bukas, gagawin namin ang best ,” saad ni Oconer. “Kakayanin namin ito, nandito na kami eh, ilalaban na namin ito kasi nagpunta kami rito para manalo sa team at individual”.
Nasa second spot ng overall IC si Navy at 2018 king Ronald Oranza sa event na inorganisa ng LBC at pakikipagtulungan ng Manny V. Pangilinan Sports Foundation.
Ang ibang Navy riders na nasa third hanggang sixth sa IC ay sina Ronald Lomotos, (3rd), John Mark Camingao, (4th), Junrey Navarra, (5th) at El Joshua Carino, (6th).
Samantala, tuluyan ng ikakahon ng Standard Insurance ang overall team classification, nakalikom sila ng 92:18.09 lamang ng 23 minutes at 40 seconds sa segundang Go for Gold, pangatlo ang Army habang pang-apat ang 7Eleven.
- Latest