Philippine squash pumalo ng 2 ginto sa SEA Cup
MANILA, Philippines — Humakot ang national squash team ng dalawang ginto at apat na tansong medalya sa 6th Southeast Asian Cup Squash Championship na ginanap sa Bangkok, Thailand.
Winalis ng Pilipinas ang dalawang gintong medalya sa jumbo doubles matapos hablutin ang korona sa men’s at women’s divisions.
Nagsanib-puwersa sina Robert Garcia at David William Pelino upang patumbahin sina Satria Laksana at Agung Wilant ng Indonesia sa pamamagitan ng 12-15, 15-14, 11-3 desisyon sa men’s finals para masiguro ang ginto.
Agad namang sumalo sa tagumpay sina Jemyca Aribado at Yvonne Alyssa Dalida nang ilampaso ng Pinay duo sina Nisa Nur Fadillah at Yaisha Putri Yasandi ng Indonesia, 15-8, 15-7, tungo sa kampeonato sa women’s division.
Nakahirit naman ng tig-iisang tanso sina Aribado, Garcia, Dalida at dating gold medallist Reymark Begornia sa singles events.
Nalampasan ng Pinoy squad ang isang ginto at isang pilak na medalyang nakuha nito noong 2016 edisyon ng torneo na ginanap sa Myanmar.
- Latest